ရခိုင်သမိုင်းသုတေသီ ရမ္မာဝတီ အသျှင် ပညာစာရ

ထောင်ဒဏ် ၈ နှစ်ကျော် ချမှတ်ခံထားရတဲ့ ရခိုင်ပြည်နယ် စစ်တွေမြို့ မဟာမုနိ ဗုဒ္ဓဝိဟာရကျောင်းက သမိုင်း သုတေသီ ဆရာတော် ဦးပညာစာရကို စစ်အစိုးရ အာဏာပိုင်တွေက မိသားစုနဲ့ ရှေ့နေကို အကြောင်းမကြားပဲ စစ်တွေ အကျဉ်းထောင်ကနေ အခြားထောင်တခုကို ပြောင်းရွှေ့လိုက်တယ်လို့ ဆရာတော့်ကို အောက်တိုဘာ ၁၈ ရက် ဒီကနေ့ ထောင်ဝင်စာ သွားတွေ့ဖို့ ကြိုးပမ်းခဲ့သူတွေက RFA ကို ပြောပါတယ်။

(Map: AAPP)

မြန်မာနိုင်ငံတဝန်း အကျဉ်းထောင်များ တည်နေရာပြ မြေပုံ ဖြစ်ပါသည်။ နာမည်ဆိုးဖြင့် ကမ္ဘာကျော်သော အင်းစိန်ထောင်ကို အနီရောင် အမှတ်အသား ပြထားပါသည်။ (Map: AAPP)

ဒကာ ဒါယကာမတွေအနေနဲ့ ဆရာတော် ဘယ်ထောင်ကို ပြောင်းရွှေ့ခံရတယ်ဆိုတာ ဆက်လက် စုံစမ်းနေကြဆဲ ဖြစ်တယ်လို့ ဆရာတော်ရဲ့ ရှေ့နေ ဒေါ်အေးနုစိန်က ပြောပါတယ်။

“ထောင်ဝင်စာ တွေ့ခွင့်ပြုထားတဲ့ ဆရာတော်ရဲ့ တူ ဒကာပေါ့လေ၊ အဲဒါ ဒီနေ့ သွားပြီးတော့ ထောင်ဝင်စာ သွားတွေ့တဲ့ အချိန်မှာမှ မရှိတော့ဘူးဆိုတာပဲ သိရပါတယ်။ ဘယ်ကို ပို့လိုက်လဲဆိုတော့ မသိပါဘူးပေါ့။ မရှိဘူးဆိုတာကိုပဲ အတည်ပြုလိုက်ပါတယ်။ ဘယ်ထောင်ကို ပို့လဲဆိုတာတော့ အခုထိ မသိရသေးပါဘူး။ ဆိုတော့ ဒီနေ့တော့ စုံစမ်းနေကြပါတယ်။ ဒကာတွေ အဖွဲ့ကပေါ့။”

ဆရာတော် ဦးပညာစာရဟာ သက်တော် ၅၇၊ ဝါတော် ၃၇ ဝါ ရှိပြီး၊ အခုနှစ် ဇူလိုင်လ ၂၇ ရက်နေ့ကတည်းက လူဝတ်လဲ ဖမ်းဆီးခံထားရတာ ဖြစ်ပါတယ်။ စစ်အစိုးရက ဆရာတော်ကို ဖမ်းဆီးပြီးနောက် ဘာသာ သာသနာ ညှိုးနွမ်းစေမှု၊ သာသနာ့မြေကို ငှားရမ်း အသုံးပြုမှု၊ နိုင်ငံတည်ငြိမ်ရေးကို ထိပါးနှောင့်ယှက်မှု၊ လိမ်လည်မှု၊ စည်ပင်သာယာ အက်ဥပဒေ၊ တရားမဝင် နိုင်ငံခြားငွေ ကိုင်ဆောင်မှု၊ နိုင်ငံခြားငွေ လဲလှယ်ရေး အက်ဥပဒေ စတဲ့ ပုဒ်မ ၇ ခုတပ် တရားစွဲဆိုခဲ့ပြီး၊ စက်တင်ဘာလ ၂၉ ရက်နေ့က ထောင်ဒဏ် ၈ နှစ်နဲ့ ၃လအပြင် ငွေဒဏ် ကျပ်ငွေတသောင်း ပြစ်ဒဏ် ချမှတ်ခဲ့ပါတယ်။

ဆရာတော်ဟာ စစ်တွေ အကျဉ်းထောင်မှာ ရှိခဲ့စဉ်အတွင်း အာဟာရ ချို့တဲ့မှုကြောင့် ဖောရောင်တဲ့ ဝေဒနာ ခံစားနေခဲ့ရတယ်လို့လည်း သိရပါတယ်။

ဆရာတော် ဦးပညာစာရရဲ့ ရှေ့နေ ဒေါ်အေးနုစိန်ကို RFA အဖွဲ့သား ကိုကျော်ကျော်အောင် ဆက်သွယ် မေးမြန်းထားပါတယ်။

http://www.rfa.org/burmese/news/arakanese_abbot_transferred_to_another_prison-10182010160136.html

သံဃာတော်များ ဦးဆောင်သည့် ရွှေဝါရောင်တော်လှန်ရေး ၃ နှစ်ပြည့် နှစ်ပတ်လည် ကာလအတွင်းမှာပဲ ရခိုင်ပြည်နယ် စစ်တွေမြို့ က သက်တော် ၅၇ နှစ်၊ ၀ါတော် ၃၇ ၀ါ ခန့်ရှိ ဆရာတော် အရှင်ပညာစာရကို စစ်အာဏာပိုင်များက နှစ်ရှည် ထောင်ဒဏ် ချမှတ်ခဲ့ သည်။

အရှင်ပညာစာရ (ဓာတ်ပုံ - နိဉ္ဇရာ)

ရခိုင်ပြည်နယ် စစ်တွေမြို့ မဟာမုနိ ဗုဒ္ဓ၀ိဟာရကျောင်းတိုက်မှ ရခိုင်သမိုင်း သုတေသီ အရှင်ပညာစာရကို ဇူလိုင်လ ၂၇ ရက်နေ့ တွင် အာဏာပိုင်များက လာရောက် ဖမ်းဆီးခဲ့ပြီး ကျောင်းတိုက်ကိုပါ ချိပ်ပိတ်ခဲ့ခြင်းဖြစ်သည်။

ထို့နောက် ဆရာတော် စောင့်ရှောက်ထားသော မိဘမဲ့ကလေး ၁၅၀ ကျော်ကို အာဏာပိုင်များက အစိုးရ လူမှုဝန်ထမ်း ဦးစီးဌာန များသို့ ပို့ဆောင်ခဲ့ပြီး ဆရာတော် စုဆောင်းထားသော ရခိုင် ယဉ်ကျေးမှုဆိုင်ရာ ပစ္စည်းများကိုလည်း သိမ်းယူခဲ့သည်။

ဆရာတော်ကို စစ်တွေ ခရိုင်တရားရုံးတွင် ပုဒ်မ ၇ ခုနှင့် တရားစွဲဆို စစ်ဆေးခဲ့ကာ စက်တင်ဘာ ၂၉ ရက်နေ့တွင် နှစ်ရှည် ထောင်ဒဏ် ချမှတ်ခဲ့ ခြင်းဖြစ်သည်။

ဆရာတော် အရှင်ပညာစာရ ၏ တရားခွင် လွတ်လပ် မျှတမှု နှင့် စပ်လျဉ်း၍ ဆရာတော်၏ ရှေ့နေ ဒေါ်အေးနုစိန်ကို ဧရာဝတီ သတင်းထောက် မင်းနိုင်သူက ဆက်သွယ် မေးမြန်း ထားပါသည်။

မေး။    ။ ပြီးခဲ့တဲ့လ ၂၉ ရက်နေ့က အရှင်ပညာစာရကို ထောင်ဒဏ် ၈ နှစ် ၃ လ နဲ့ ဒဏ်ငွေ ကျပ် ၁ သောင်း ချမှတ်လိုက်ပြီ ဆိုတော့ ဘာတွေဆက်လက် ဆောင်ရွက်ပေးသွားဖို့ ရှိပါသလဲ။

ဖြေ။    ။ ဒဏ်ငွေ တသောင်းကိုတော့ ပေးဆောင်လိုက်ပါပြီ။ နောက် ပြစ်မှုဆိုင်ရာ ဥပဒေပုဒ်မ ၂၉၂ ၊ ၂၉၅ ၊ ၄၀၆ နဲ့  နိုင်ငံခြား ငွေကြေး လက်ဝယ် ကိုင်ဆောင်တယ် ဆိုတဲ့ ပုဒ်မ ၂၄(၁) အမှုတွေအတွက်ကို အယူခံတင်သွင်းသွားဖို့ ရှိပါတယ်။

မေး။    ။ ဆရာတော်ကို မာတေဇ လူမှုရေး အဖွဲ့အစည်းက လူတချို့က တိုင်တန်းခဲ့တယ်လို့ ကြားထားရပါတယ်။ တကယ်တမ်း တရားစွဲဆိုတဲ့အခါမှာ ဘယ်သူက တရားလိုအဖြစ်နဲ့ စွဲခဲ့တာပါလဲ။

ဖြေ။    ။ အမှုတမှုမှာ ဦးထွန်းသိန်း ဆိုတဲ့ နာမည်နဲ့ အမှုစွဲတင်ပြီးတော့၊ နောက်တမှုမှာတော့ ဦးထွန်းသိန်းရဲ့ တိုင်တန်းမှုကို မူတည် ပြီး အမှတ် ၁ ရဲစခန်းမှူး ဦးမြို့ဆွေက တရားလိုအနေနဲ့ ၂ မှုခွဲပြီး စွဲပါတယ်။

ဦးထွန်းသိမ်းရဲ့ ပထမတိုင်စာအရ ပြစ်မှုဆိုင်ရာ ဥပဒေပုဒ်မ ၄၂၀၊ ၂၉၂၊ ၂၉၅၊ ၄၀၆၊ ၅၀၅ (ခ) နဲ့ ပြစ်မှုဆိုင်ရာ မူလအမှု အမှတ် ၆၁/ ၂၀၁၀ နဲ့ စွဲဆိုခဲ့ပြီး ရဲအုပ်ဦးမြို့ဆွေကတော့ ပြစ်မှုဆိုင်ရာ မူလအမှုအမှတ် ၆၂/ ၂၀၁၀မှာ  နိုင်ငံခြားငွေ လဲလှယ်ခြင်းဆိုင်ရာ စည်းမျဉ်း သတ်မှတ်မှု ဥပဒေပုဒ်မ ၂၄ (၁)နဲ့ တမှုစွဲဆိုပါတယ်။ နောက် ပြစ်မှုဆိုင်ရာ မူလအမှုအမှတ် ၆၃/၂၀၁၀ မှာ စည်ပင် အက် ဥပဒေ ပုဒ်မ ၆၁ (ဂ) နဲ့လည်း ဦးမြို့ဆွေကပဲ တရားလို ပြုလုပ်ပါတယ်။
မေး။     ။ ဆရာတော်နဲ့ စွပ်စွဲခံရတဲ့ ဒေါ်မာလာက တရားရုံးမှာ သူနဲ့ ငြိစွန်းမှုမရှိပါဘူးလို့ ထွက်ဆိုခဲ့တယ်လို့ ကြားသိထားရပါတယ်။ ဟုတ်ပါသလား။

ဖြေ။     ။ ဟုတ်ပါတယ်။

မေး။     ။ တရားခွင်အတွင်းမှာ တရားလိုဘက်က သက်သေ ဘယ်နှဦး တင်သွင်းခဲ့တာပါလဲ။

ဖြေ။     ။ အမှုအမှတ် ၆၁/ ၂၀၁၀အတွက် တရားလိုပြသက်သေ ၂၅ ဦးတင်သွင်းပါတယ်။ နောက်ထပ် ၂ ဦးတင်သွင်းတဲ့အခါ ၁ ဦး ကိုပဲ စစ်မေးပြီး ၁ ဦးကို ပယ်ခဲ့ပါတယ်။ တရားလိုပြသက်သေ ၂၆ ဦး စစ်မေးခဲ့ရပါတယ်။

မေး။     ။ ဆရာတော်ဘက်က သက်သေ ၃၄ ဦးတင်ခဲ့တယ်။ ဒီသက်သေတွေကို ရဲက ဖိအားလိုက်ပေးတာတွေရှိခဲ့ပြီး နောက်ပိုင်းမှာ သက်သေတချို့ကို မတင်သွင်းတော့ဘူးလို့ သိရပါတယ်။ ဘယ်လိုကြောင့် မတင်သွင်းခဲ့တော့တာပါလဲ။

ဖြေ။     ။ ကျမက အမှုတွေအတွက် သက်သေ ၃၄  ဦး တင်ပြခဲ့ပါတယ်။ ဒါပေမယ့် ၆၁/ ၂၀၁၀ အတွက် ဆရာတော်က စွဲချက်ကို မကျေနပ်လို့ ပြင်ဆင်နေတဲ့ အချိန်မှာပဲ ပြည်နယ်တရားရုံးက အကျဉ်းနည်းနဲ့ ပလပ် လိုက်တယ်။ အဲဒီအချိန်မှာပဲ ဆရာတော်ကို စစ်တယ်ဆိုတော့ ဆရာတော်က ကိုယ်တိုင်ပဲအစစ်ခံပြီး ကျန်သက်သေတွေကို မပြတော့ဘူးဆိုပြီး ရပ်တည်ခဲ့တာပါ။ အဲဒီလို ပြည်နယ်က အကျဉ်းနည်းနဲ့ ပြင်ဆင်မှုကို ပလပ်လိုက်တဲ့အပေါ် တရားရုံးချုပ်ကို ပြင်ဆင်မှုဆက်တင်ပါတယ်။ ဒါပေမယ့် ဒီမှာတော့ ဒီပုဒ်မနဲ့ပဲ ဆရာတော်ကို စစ်ဆေးပြီး အမိန့်ချလိုက်တဲ့ အဆင့်ကို ရောက်သွားခဲ့ပါတယ်။

မေး။     ။ တရားခွင် မစတင်မီကစပြီး တရားလိုပြသက်သေအဖြစ် ထွက်ဆိုမယ့် ဒေါ်မာလာတို့လို အရေးကြီး သက်သေတွေကို တရားလိုပြုလုပ်မယ့် ရဲစခန်းထဲမှာ ခေါ်ထားခဲ့တာဟာ တရားဥပဒေနဲ့ လျော်ညီပါရဲ့လား။

ဖြေ။      ။ ကျမ အဲဒီအကြောင်းအချင်းအရာတွေ ပေါ်လွင်အောင် စစ်မေးခဲ့ပါတယ်။ သူတို့ကလည်း ၀န်ခံခဲ့ကြပါတယ်။ ဥပဒေနဲ့ ညီ၊ မညီ သုံးသပ်ဖို့က တရားရုံးရဲ့ အပိုင်းပါ။ ကျမတို့ကတော့ သူတို့ရှိနေခဲ့တဲ့ အနေအထားတွေကို ရုံးရှေ့သက်သေခံချက်တွေမှာ ပေါ်လွင်အောင် စစ်မေးထားခဲ့ပါတယ်။

မေး။     ။ စောစောပိုင်းက ၅၀၅ (ခ) အပါအ၀င် ပုဒ်မ ၇ ခုနဲ့ စွဲဆိုတယ်လို့ ကြားပါတယ်။ နောက်ပိုင်းမှာ ပုဒ်မ ၂ ခု မပါတော့ဘူး ဆိုတာ ဘယ်လိုကြောင့်ပါလဲ။

ဆရာတော် အရှင်ပညာစာရနှင့် ဆရာတော် စောင့်ရှောက်ထားသည့် ကလေးငယ်များ (ဓာတ်ပုံ - Freedom Burma)

ဖြေ။     ။ ၆၁/ ၂၀၁၀ အတွက် မူလစွဲဆိုတဲ့ ပုဒ်မက ၅ ခုပါ။ တရားလိုပြသက်သေ ၂၆ ဦးကို စစ်ပြီးတဲ့အခါ ဒီ ပုဒ်မတွေနဲ့ စွဲသင့်၊  မစွဲသင့် ကျမတို့က လျှောက်လဲချက် ပေးရပါတယ်။ အဲဒီလို ပေးတဲ့အချိန်မှာ ဥပဒေ အကြံပြုရုံးကလည်း ပုဒ်မ ၄၂၀ နဲ့ ၅၀၅ (ခ) ၂ ခုဟာ မစွဲသင့်ကြောင်း အကြံပြုတဲ့အတွက် တရားရုံးက ဒီပုဒ်မ ၂ ခုကို ဖြုတ်လိုက်တာပါ။ ကျန်ပုဒ်မတွေနဲ့ စွဲချက်တင်တာကိုလည်း ကျမတို့ မကျေနပ်တဲ့အတွက် ပြည်နယ်ရုံးကို ပြင်ဆင်မှုအမှတ် ၁၁၃/ ၂၀၁၀ နဲ့ တက်ရောက်ခဲ့ပါတယ်။ ဒါပေမယ့် အဲဒီနေ့ ချက်ချင်း ပါပဲ ပလပ်ခံခဲ့ရတယ်။ ဒါနဲ့ ၂၉ ရက်နေ့မှာပဲ နိုင်ငံတော်တရားရုံးချုပ်ကို ပြင်ဆင်မှု ဆက်တက်ပါတယ်။  အဲဒီလို ပြင်ဆင်မှု တက် ရောက်ထားဆဲ ကာလမှာပဲ ခရိုင်တရားရုံးက ဆရာတော်ကို စစ်ဆေးပါတယ်။ ဒါကြောင့် မူလက တင်ပြထားတဲ့ သက်သေ ၃၄ ဦး ကို မတင်ပြတော့ဘဲ ဆရာတော် ကိုယ်တိုင်ပဲ အစစ်ခံပါတယ်။ အဲဒီနောက် နှစ်ဘက် လျှောက်လဲချက်တွေ ကြားနာပြီး ပြစ်ဒဏ်တွေ ချမှတ်လိုက်ပါတယ်။

မေး။     ။ ဆရာတော်ရဲ့ ရှေ့နေတဦးအနေနဲ့ ဆရာတော် အထိန်းသိမ်းခံနေရစဉ် အတွင်းမှာ အမှုအတွက် ပြင်ဆင်နိုင်ဖို့ ဘယ်နှကြိမ် တွေ့ဆုံခွင့် ရခဲ့ပါသလဲ။

ဖြေ။     ။ ကျမနဲ့ တွဲဖက်လိုက်ပါတဲ့ ရှေ့နေမလေး ၂ ဦးနဲ့အတူ ဆရာတော် အထိန်းသိမ်းခံထားရတဲ့ ထောင်အတွင်းမှာ ၂ ကြိမ် တွေ့ခွင့်ရပါတယ်။

မေး။     ။ ဒီအမှုအတွက် ၂ ကြိမ်ပဲတွေ့ခွင့်ရတာဟာ လျှောက်လဲချက်တွေ ပြင်ဆင်ဖို့ လုံလောက်တဲ့အချိန်ရခဲ့တယ်လို့ ပြောနိုင် ပါ့မလား။

ဖြေ။     ။ ဒီအမှု တခုလုံးရဲ့ အနေအထားကို ကြည့်မယ်ဆိုရင်တော့ ပထမ တရားလိုပြသက်သေ ၂၆ ဦးကို စစ်ဆေးတဲ့ အဆင့်မှာ တော့ တရက်ခြား စစ်ဆေးပါတယ်။ ဆရာတော်ကို စွဲချက်တင်ပြီးတဲ့နောက်မှာတော့ နေ့စဉ်ရက်ဆက် စစ်ဆေးတဲ့ အနေအထားကို ကျမ ကြုံခဲ့ရပါတယ်။ မနက် ၁၀ နာရီကနေ ညနေ ၄ နာရီအထိ တောက်လျှောက်ကြီးပဲ စစ်တာပါ။ ဒီလို စစ်နေတဲ့ ရုံးချိန်း ၆ ချိန်း လောက် ကျော်ပြီး နောက်ပိုင်းမှာမှ ကြားမှာ ၁၅ မိနစ် နားခွင့်ပေးခဲ့ပါတယ်။ အဲဒီလို အနေအထားမျိုးမှာ ကျမတို့ဘက်က အမှု အတွက် ပြင်ဆင်ချိန် လုံလောက်မှု ရှိတယ်၊ မရှိတယ်ဆိုတာကို ပြောစရာမလိုဘဲနဲ့ ဘယ်သူမဆို ချင့်ချိန်ပြီး သုံးသပ်နိုင်တယ်လို့ပဲ ကျမ ပြောချင်ပါတယ်။

http://www.irrawaddy.org/bur/index.php/interview/4-interview/4202-2010-10-02-09-29-02

ရဟန်းတော် တစ်ပါးနှင့် အင်တာဗျူး

ဆရာတော် အရှင်ပညာစာအား နောက်ဆုံး တရားစီရင်သည့်နေ့က တရားရုံးသို့ ကိုယ်တိုင် သွားရောက်ခဲ့သူ ရဟန်းတော်နှင့် အင်တာဗျူး

မေး။ ။ ဆရာတော် အရှင် ပညာစာရ တရားစီရင်တဲ့နေ့က ဦးဇင်း မြင်တွေ့ခဲ့ရတဲ့ မြင်ကွင်းလေးကို ပြောပြပါလား အရှင်ဘုရား။

ဖြေ။ ။ အဲဒီနေ့က ဦးဇင်းနဲ့ ဦးဇင်းတို့ကျောင်းက ရဟန်း သုံးပါး အခြေအနေ ဘယ်လိုရှိတယ် ဆိုတာကို သိချင်တဲ့ စစ်တွေ ခရိုင်တရားရုံးကို သွားခဲ့ကြပါတယ်။ ဘယ်သူ့ကိုမှ တရားရုံးထဲကို ၀င်ခွင့်မပြူဘူး။ ရဲသားတွေကို တရားရုံး အပြည့်ချထားတယ်။ ရဲဆိုင်ကယ်တွေရော၊ ကားတွေရော အပြည့်ဘဲ။ စရဖတွေရော၊ SB တွေရော အပြည့်ဘဲ။ တရားရုံးရှေ့ ပတ်ပတ်လည်မှာ လူတွေ အပြည့်ဘဲ။

မေး။ ။ အပြည့်ဆိုတော့ ပြည်သူလူထုက ဘယ်လောက်များလဲ အရှင်ဘုရား။

ဖြေ။ ။ ၁၀၀ ကျော်မယ်ထင်တယ်။

မေး။ ။ ရဟန်းတော်တွေက အရှင်ဘုရားတို့ ကျောင်းက လေးပါးတည်းလား ဘုရား။

ဖြေ။ ။ ရဟန်း အပါး ၂၀ လောက်ရှိမယ် ထင်တယ်။ ဝေသာလီ ဘုန်းတော်ကြီး စာသင်ကျောင်းက ဆရာတော်လည်း လာပါတယ်။ သူ့ကိုလည်း ရဲတွေက တရားရုံးထဲကို ၀င်ခွင့် မပြုဘူး။

မေး။ ။ နောက်ထပ်ဘယ်သူတွေ လာသေးလဲ အရှင်ဘုရား။

ဖြေ။ ။ ဆရာတော် ပညာစာရရဲ့ ဆွေမျိုးတွေနဲ့ ဆရာတော်ကို လေးစားကြည်ညိုကြတဲ့ တပည့် တကာ တကာမတွေ ဖြစ်ကြပါတယ်။ မြင်ရတာကတော့ တော်တော် ၀မ်းနည်း စရာကောင်းပါတယ်။ ဆရာတော်ရဲ့ ဆွေမျိုးတွေကိုလည်း တရားရုံးကို တက်ရောက်နားထောင်ခွင့် မပြုဘူး။ အပြင်ကဘဲ စောင့်နေကြရတယ်။ ဆရာတော်ကို ထောင် ၈ နှစ်နဲ့ ၃ လ ချလိုက်တယ်ဆိုတဲ့ သတင်း ထွက်လာတာနဲ့ ဆရာတော်ရဲ့ ဆွေမျိုးတွေနဲ့ တပည့် တကာ တကာမ တွေ ငိုလိုက်ကြတာ ဦးဇင်းတောင် မျက်ရည် လည်မတတ် ဖြစ်သွားခဲ့ရတယ်။

မေး။ ။ တရားစီရင်ပီးတဲ့ နောက်မှာ ဆရာတော်ကို ဆွေမျိုးတွေက တွေ့ခွင့်ရပါသလား အရှင်ဘုရား။

ဖြေ။ ။ ဆရာတော်ရဲ့ ဆွေမျိုး တစ်ဦးဘဲ တွေ့ခွင့်ရတယ်လို့ သိရပါတယ်။ ကျန်တဲ့သူ ဘယ်သူမှ တွေ့ခွင့်မရဘူးလို့ သိရပါတယ်။

မေး။ ။ ရဲတွေက တရားရုံးထဲကို ဘာကြောင့် ၀င်ခွင့် မပြုတာလဲ အရှင်ဘုရား။

ဖြေ။ ။ ဦးဇင်းတို့လည်း မသိဘူး။ မ၀င်ရဘူးဆိုတော့ ဦးဇင်းတို့လည်း အပြင်ကဘဲ စောင့်ကြည့် နေကြတယ်။ ရဲတွေက တရားရုံးနား ကပ်လာတဲ့ သူတွေကို ဓါတ်ပုံတွေ လိုက်ရိုက်တော့ လူတွေက ရုံးနားကို သိပ်မကပ်ကြဘူး။ ပီးရင် ရဲတွေက လာတွေသူတွေကို ဘာကြောင့်လာတာလဲ။ ဆွေမျိုးတော်လား စသဖြင့် မေးမြန်းတာတွေ ရှိတယ်။ လူတွေ အနေနဲ့ ရဲက ဓါတ်ပုံတွေ လိုက်ရိုက်တော့ ကြောက်ကြတယ်လေ။ ရုံးနာကို လာတော့ လာကြတယ်။ ဓါတ်ပုံ လိုက်ရိုက်တော့ မလိုလားအပ်တဲ့ ပြဿနာတွေ ဖြစ်မှာကို စိုးရိမ်ပြီး လူတွေက လာကြတယ်။ ချက်ချင်း ပြန်သွား ကြတယ်။

မေး။ ။ ဆရာတော်ကို ဘယ်အမူတွေနဲ့ ထောင်ချတယ်လို့ သိရပါသလဲ အရှင်ဘုရား။

ဖြေ။ ။ ထောင်ချတာက ၈ နှစ်နဲ့ သုံးလ၊ အလုပ်ကြမ်း၊ ငွေ တစ်သောင်း ဒဏ်တပ် တယ်လို့ သိရ ပါတယ်။ နိုင်ငံခြားက လူတွေရဲ့ အကူအညီနဲ့ ကျောင်းကို ရပ်တည်ထားတော့ နိုင်ငံခြားသားတွေ လှူတဲ့ နိုင်ငံခြားငွေကို ကိုင်ဆောင်တဲ့ အတွက် ထောင် သုံးနှစ် အပါအ၀င် သာသနာညိုးနွမ်းစေမူ စတဲ့ အမူတွေနဲ့ ထောင်ချလိုက်တာ ဖြစ်ပါတယ်။

မေး။ ။ ဆရာတော်ကို ခုလို ထောင်ချလိုက်တဲ့ အပေါ် ဘယ်လိုမြင်ပါသလဲ။

ဖြေ။ ။ လူမျိုးရေးအရ အနိုင်ကျင့်တယ်လို့ မြင်တယ်။

မေး။ ။ ဘာကြောင့်ပါလဲ အရှင်ဘုရား။

ဖြေ။ ။ ဆရာတော်ဟာ ရခိုင်သမိုင်းသုတေသီ တစ်ဦးဖြစ်တဲ့ အတွက် ရခိုင်လူမျိုးတွေအတွက် အထူ တန်ဖိုးရှိတဲ့ ဆရာတော် တပါးဖြစ်တယ်။ ပီးရင် ဆရာတော်ဟာ ပရဟိ ဆရာတော် တစ်ပါး ဖြစ်ပြီး လူအများကို ကူညီတဲ့ ရဟန်း တစ်ပါး ဖြစ်တယ်။ ရခိုင်သမိုင်း ဗမာသမိုင်းကို ကောင်းမွန်စွာသိသူ တစ်ဦး ဖြစ်တယ်။ ပီးရင် ကာယကံရှင် အမျိုးသမီးတွေက သူတို့နဲ့ ကျူးလွန်တာ မရှိပါဘူးလို့ အတိအလင်း ထွက်ဆိုထားပေမယ့် ထောင် ၈ နှစ်နဲ့ ၃ လ ချတယ်ဆိုတော့ သက်သက် မတရား သဖြင့် အနိုင်ကျင့် တယ်လို့ မြင်တယ်။

( အင်တာဗျူးကို ၂၀၁၀ ခုနှစ် အောက်တိုဘာလ ၃ ရက်နေ့တွင် ထုတ်လွှင့်မည့် လွတ်လပ်သော အာရှသံ (မြန်မာပိုင်း) ရခိုင်အစီအစဉ်တွင် နားထောင်နိုင်ပါသည်။)

: ----------------------------------- ----------------------------------- ----------------------------------- :

(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)

http://www.narinjara.com/detailsbur.asp?id=2768

စစ်တွေမြို့မှ ထုတ်လွှင့်နေသော ပဉ္စ၀တီ FM မှ ဆရာတော် အရှင်ပညာစာရ မကောင်းကြောင်း သတင်းများကို ထုတ်လွှင့်နေကြောင်း သတင်း ရရှိသည်။

အမည်မဖေါ်လိုသူ လူငယ် တစ်ဦးက “ သူတို့က သီချင်းတွေ လွင့်တယ်။ ပီးရင် ဆရာတော် မကောင်းကြောင်း သတင်းတွေကို လွှင့်တယ်။ နောက် သတင်းတွေလာတယ်။ သီချင်းတွေက လူငယ်တွေ အကြိုက်ဆိုတော့ လူငယ် အများစုက နားထောင်ကြပါတယ်။ အဲသလို နားထောင်တဲ့ လူငယ်တွေကို ဆရာတော်ကို အရေးယူရတာဟာ မကောင်းမူ ကိုလုပ်တဲ့ အတွက် ဖြစ်တယ်ဆိုပီး သူတို့က ၀ါဒဖြန့်တာ ဖြစ်ပါတယ်” ဟု ပြောသည်။

၎င်းပြင် တခြား ရဟန်းငယ် တစ်ပါးကလည်း “ ပြည်ပ သတင်းဌာနတွေက ဆရာတော် ပညာစာရ သတင်းလာပီဆိုရင် နောက်တစ်နေ့မှာ ပဉ္စ၀င်္တီက ဆရာတော် မကောင်းကြောင်းကို လွင့်ထုတ် ပါပြီ။ ဦးဇင်းတစ်နေ့ နားထောင်တော့ သူတို့က ဘယ်လို လွင့်သလဲဆိုရင် ရခိုင်ပြည်နယ်ဟာ မြန်မာနိုင်ငံမှာ အထူးတည်ငြိမ်အေးချမ်းတဲ့ ပြည်နယ် တစ်ခု ဖြစ်တယ်။ ဒါကို မနာလို မရှု့စိမ့်တဲ့ သူတွေက ဗုံးခွဲဖို့ ကြံစည်ကြိုးစားတဲ့ အတွက် အချိန်မှီ ဖမ်းဆီး အရေးယူနိုင်ခဲ့တယ်။ ခုလည်း ဆရာတော် ပညာစာရဟာ ရခိုင်ပြည်နယ် တည်ငြိမ်ရေးကို ထိပါး နှောင့်ယှက်လာတဲ့ အတွက် သာသနာ့ သန့်ရှင်းရေး အတွက် ဖမ်းဆီး အရေးယူရတာ ဖြစ်တယ်ဆိုပီး ထုတ်လွှင့်သွားတာကို ဦးဇင်း နားထောင်လိုက်ရပါတယ်” ဟု ပြောသည်။

ပဉ္စ၀တီ FM မှာ ရခိုင်ပြည်နယ်ကို ဖွဲ့စည်းထားသော ဒွါရ၀တီ၊ ရမ္မာဝတီ၊ မေဃ၀တီနှင် ဓည၀တီတို့ အပြင် ဧရာဝတီတိုင်းသို့ပါ ထုတ်လွင့်သဖြင့် ပဉ္စ၀တီဟု အမည်ပေးထားင်္ပြီး နံနက် ၆ နာရီမှ ညနေ ၁၀ နာရီထိ ထုတ်လွှင့်ကြောင်း သိရသည်။

ယခင်က ရခိုင်စကားဖြင့် တစ်နာရီနီးပါးခန့် ထုတ်လွင့်ခွင့်ရရှိခဲ့သော်လည်း ယခုအခါ နာရီဝက်ခန့်သာ ရရှိပြီး နံနက်ပိုင်းနှင့် ညနေပိုင်းတွင် တစ်ရက် နှစ်ကြိမ်စီ ထုတ်လွင့်ကြောင်း သိရသည်။

“ အစပိုင်းကတော့ လူတွေ အတော်များများ နားထောင်ကြပါတယ်။ ခုတော့ ဘာရည်ရွယ်ချက်နဲ့ လုပ်တယ်ဆိုတာကိုတော့ သိလာတဲ့ အတွက် နားထောင်တဲ့သူက အရမ်းနည်းလာပါတယ်။ FM တစ်ခု ရှိတာတောင် ဒေသစကားပြောနဲ့ မလွင့်ရဘဲ ဗမာစကားနဲ့ လွင့်တယ်ဆိုကတည်းက ဘာရည်ရွယ်ချက်လဲ ဆိုတာ လူတွေက အခုတော့ အကုန်လုံး နားလည် သဘောပေါက်လာကြပြီ ဖြစ်ပါတယ်” ဟု အဆိုပါ လူငယ်က ပြောသည်။

ယခုအခါ ပဉ္စ၀တီ FM မှ နအဖ အကျိုးပြု ဆောင်းပါးများ၊ လုပ်ဆောင်ချက်များကိုသာ အဓိက ထုတ်လွင့်လာသဖြင့် လူထု အကျိုးပြုရေးထက် နအဖ ပေါ်လစီ မူဝါဒများကို ၀ါဒဖြန့်ရန်အတွက် ရခိုင်တွင် အခြေစိုက် လာခြင်း ဖြစ်သဖြင့် နားထောင်သူ အရေအတွက် ယခုအခါ အထူး လျော့နည်းလာကြောင်း သတင်း ရရှိသည်။

: ----------------------------------- ----------------------------------- ----------------------------------- :

(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)

http://www.narinjara.com/detailsbur.asp?id=2769

စစ်တွေမြို့ ဗုဒ္ဓ၀ိဟာရ ကျောင်းတိုက်မှ ဆရာတော် အရှင်ပညာစာရကို စစ်တွေ ဒုတိယ ခရိုင်တရားရုံးက ထောင်ဒဏ် ၈ နှစ် ၃ လနှင့် ဒဏ်ငွေ ကျပ် ၁၀၀၀၀ စီရင်ချက် ချမှတ်လိုက်ပြီ ဖြစ်သည်။

“အမှုစစ်ဆေးရာမှာ ဥပဒေနဲ့ မလျော်ညီဘူး ၊ ရဲက တရားပြိုင်ပြသက်သေတွေကို ဖိအားပေးတာတွေရှိတယ် ၊ အခု စီရင်ချက်ဟာ လည်း တရားမျှတမှုမရှိတဲ့အတွက် ဆရာတော်ရဲ့ ရှေ့နေက တရားရုံးချုပ်အထိ ပြင်ဆင်ခွင့်တင်သွားမယ်လို့ သိရတယ်"ဟု အရှင်ပညာစာရ၏ ရှေ့နေ ဒေါ်အေးနုစိန်နှင့် နီးစပ်သူက ပြောသည်။

အရှင်ပညာစာရကို နိုင်ငံခြားငွေကိုင်ဆောင်မှုအတွက် အလုပ်နှင့်ထောင်ဒဏ် ၃ နှစ် ၊ ညစ်ညမ်းမှုဖြင့် အလုပ်နှင့်ထောင်ဒဏ် ၃ လ ၊ သာသနာညိုးနွမ်းစေမှုဖြင့် ထောင်ဒဏ် ၂ နှစ် ၊ ပစ္စည်းအလွဲသုံးစားလုပ်မှုဖြင့် အလုပ်နှင့်ထောင်ဒဏ် ၃ နှစ် နှင့် စည်ပင်အက် ဥပဒေ အရ ဒဏ်ငွေကျပ် ၁၀၀၀၀ သီးခြားစီကျခံစေရန် ဒုတိယခရိုင်တရားသူကြီး ဒေါ်ဝါ၀ါထွန်းက အမိန့်ချမှတ်ခဲ့ခြင်း ဖြစ်ကြောင်း ၎င်းက ဆိုသည်။

အမှုစွဲတင်စဉ်က နိုင်ငံတော်တည်ငြိမ်အေးချမ်းမှုကို ပျက်ပြားစေသည့် ပုဒ်မ ၅၀၅ (ခ) နှင့် လိမ်လည်မှု ပုဒ်မ ၄၂၀ တို့ကိုပါ ထည့် သွင်း ခဲ့သော်လည်း နောက်ပိုင်းတွင် ထိုပုဒ်မများကို တရားရုံးက ပယ်ချခဲ့ကြောင်း သိရသည်။

အရှင်ပညာစာရကို ဇူလိုင်လ ၂၇ ရက်နေ့တွင် အာဏာပိုင်များက လာရောက် ဖမ်းဆီးခဲ့ပြီး ကျောင်းတိုက်ကိုပါ ချိပ်ပိတ်ခဲ့သည်။ ထို့နောက် ဆရာတော် ထိန်းသိမ်းစောင့်ရှောက်ထားသော မိဘမဲ့ကလေး ၁၅၀ ကျော်ကိုလည်း အစိုးရပိုင် လူမှုဝန်ထမ်း ဦးစီးဌာန များသို့ ပို့ဆောင်ခဲ့သည်။

အရှင်ပညာစာရသည် စစ်တွေမြို့၊ ကန်တော်ကြီး ရပ်ကွက်တွင် မဟာမုနိ ဗုဒ္ဓ၀ိဟာရ ကျောင်းတိုက်ကို ၁၉၉၀ ခုနှစ်က စတင် တည်ထောင်ခဲ့ကြောင်း မိဘမဲ့ ကလေးများကို လက်ခံ စောင့်ရှောက်ထားကာ ရခိုင်ယဉ်ကျေးမှုဆိုင်ရာ ပစ္စည်းများကို ရှာဖွေ စုဆောင်း လေ့ရှိသည့် သမိုင်းသုတေသီတဦးဖြစ်ကြောင်း ၊  နိုင်ငံခြားသားများနှင့် ထိတွေ့ဆက်ဆံမှုများရှိခဲ့ရာ အာဏာပိုင်များက သဘောမတွေ့သဖြင့် အမှုရှာဖမ်းဆီးခြင်းဖြစ်နိုင်ကြောင်း မြို့ခံများက ယူဆနေကြသည်။

အရှင်ပညာစာရ၏ တရားခွင်သည် လွတ်လပ်သည့် တရားခွင် မဖြစ်ခဲ့သည့်အပြင် တရားလိုပြသက်သေများကို တရားလို ရဲရှိရာ ရဲစခန်းအတွင်း ခေါ်ယူထားခြင်း ၊ တရားပြိုင်ပြ သက်သေများကို ရဲက ဖိအားပေးနှောင့်ယှက်ခြင်းများ ရှိခဲ့ကြောင်း အမှုကို စောင့်ကြည့်နေသူများက ပြောဆိုသည်။

ရခိုင်ပြည်နယ်မှ ကျောင်းထိုင်ဆရာတော် ၁၄ ပါးကလည်း အရှင်ပညာစာရအမှုကို ထိန်းထိန်းသိမ်းသိမ်းဆောင်ရွက်ပေးရန် အနောက်ပိုင်းတိုင်း တိုင်းမှူးထံ ယခုလ ၇ ရက်က လက်မှတ်ရေးထိုး စာပေးပို့ထားခဲ့သော်လည်း အကြောင်း ပြန်ကြားခြင်းမရှိခဲ့ပေ။

လတ်တလောတွင် ရခိုင်ပြည်နယ်ရှိစာသင်သားသံဃာများက ဆရာတော်လွတ်မြောက်ရေးထပ်မံတောင်းဆိုရန် ပြင်ဆင်နေကြ ကြောင်း သိရသည်။

မြန်မာနိုင်ငံတ၀န်းရှိ ထောင်များထဲတွင် သံဃာတော် ၂၅၇ ပါးနှင့် သီလရှင် ၆ ပါးကို နအဖ စစ်အစိုးရက ထိန်းသိမ်း ထားဆဲဖြစ်ကြောင်း ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စာရင်းတွင် ဖော်ပြထားသည်။

http://irrawaddy.org/bur/index.php/news/1-news/4172-2010-09-29-10-01-14

ပုဒ်မ ၇ ခုဖြင့် ဒေသခံရဲက အမှုစွဲတင်ထားသော စစ်တွေမြို့ရှိ ဗုဒ္ဓ၀ိဟာရ ကျောင်းတိုက်မှ ဆရာတော် အရှင်ပညာစာရကို မနက်ဖြန်တွင် တရားရုံးက စီရင်ချက်ချရန် ရုံးချိန်းပေးလိုက်ပြီ ဖြစ်ကြောင်း သိရသည်။

နိုင်ငံတော် တည်ငြိမ်ရေးကို ထိပါးနှောင့်ယှက်မှုအပါအဝင် ပုဒ်မ ၇ ခုနှင့် တရားစွဲခံထားရသည့် အရှင်ပညာစာရ နှင့် ကလေးငယ်များ(ဓာတ်ပုံ - Freedom Burma)

ထိုအမှုကို စောင့်ကြည့် နေသော ရခိုင် တိုင်းရင်းသားများ တိုးတက်ရေး ပါတီ၏ အတွင်းရေးမှူး ကိုခိုင်ပြည်စိုးက “မနေ့က အထိ တောက်လျှောက် ရုံးထုတ် စစ်ဆေး လာပြီး မနက်ဖြန်မှာ စီရင်ချက် ချတော့မယ်လို့ ရုံးချိန်းပေး လိုက်ပါတယ်။ ကျနော်တို့ မြို့ခံတွေ ကတော့ ဘယ်လိုပဲ ဖြစ်ဖြစ် ဒီကိစ္စဟာ အစိုးရ တရားရုံးက ကိုင်တွယ်ခွင့် မရှိဘဲ သံဃာ့ အရေးကို သံဃာ့ အဖွဲ့အစည်း တွေကပဲ ဆောင်ရွက်ခွင့် ရှိတယ်လို့ မြင်ကြတယ်” ဟု ဧရာဝတီသို့ ပြောသည်။

အရှင်ပညာစာရကို ဇူလိုင်လ ၂၇ ရက်နေ့တွင် အာဏာပိုင်များက လာရောက် ဖမ်းဆီးခဲ့ပြီး စစ်တွေအမှတ် ၁ ရဲစခန်းတွင် လူဝတ်လဲပေးကာ ချုပ်နှောင်ခဲ့သည်။ 

ထို့နောက် စစ်တွေအမှတ် ၁ ရဲစခန်းမှူး ရဲအုပ်မြို့ဆွေက တရားလိုပြုလုပ်၍  ပုဒ်မ ၄၂၀ လိမ်လည်မှု၊ ပုဒ်မ ၂၉၅ (က) ဘာသာသာသနာ ညှိုးနွမ်းစေမှု၊ ပုဒ်မ ၄၀၆ ယုံကြည်အပ်နှံထားသည့် ပစ္စည်းကို အလွဲသုံးစားမှု၊ ပုဒ်မ ၅၀၅ နိုင်ငံတော် တည်ငြိမ်ရေးကို ထိပါးနှောင့်ယှက်မှု၊ ပုဒ်မ ၂၉၂ သာသနာ့နယ်မြေကို အခကြေးငွေဖြင့် ငှားရမ်းအသုံးပြုမှု၊ နိုင်ငံခြားငွေ လဲလှယ်ရေး အက်ဥပဒေ ပုဒ်မ ၂၄ (၁)၊ စည်ပင်သာယာ အက်ဥပဒေ ပုဒ်မ ၆၁ (ဂ) စသည့် ပုဒ်မ တို့ဖြင့် စွဲချက်တင်ကာ စစ်တွေ တရားရုံးသို့ တင်ခဲ့ခြင်းဖြစ်သည်။

“မနေ့က တရားရုံးမှာ ရှေ့နေဒေါ်အေးနုစိန်က တရားခံကို အနားမပေးဘဲ နေ့စဉ်ရက်ဆက် ရုံးတင်စစ်ဆေးနေတာဟာ ဥပဒေနဲ့ လျော်ညီပါရဲ့လား၊ ဒီလို စစ်ဆေးနေတာဟာ ရခိုင်တပြည်နယ်လုံးမှာ ဒီအမှုတခုပဲ ရှိနေလို့လား၊ တရားပြိုင်ရှေ့နေ တဦးအနေနဲ့ အသေးစိတ် စုံစမ်းမေးမြန်းပိုင်ခွင့်မရှိဘူးလား၊ တရားပြိုင်ပြ သက်သေတွေကို လိုအပ်တာထက် ပိုမိုစစ်ဆေးတာဟာ ဥပဒေနဲ့ ညီရဲ့လား စတဲ့ အချက် ၄ ချက်ကို တရားရုံးကို မေးမြန်းခဲ့ပြီး ရုံးပြောင်း စစ်ဆေးပေးဖို့ တောင်းဆိုတာကို တရားသူကြီးမက ဒါဟာ ရုံးတော်ကို မထီမဲ့မြင်ပြုတာဆိုပြီး အချေအတင်ဖြစ်ခဲ့ရပါသေးတယ်” ဟု အရှင်ပညာစာရ၏ ရှေ့နေ ဒေါ်အေးနုစိန်နှင့် နီးစပ်သူက ပြောသည်။

တရားပြိုင်ရှေ့နေ ဒေါ်အေးနုစိန် ခရီးထွက်ခိုက် လွှဲအပ်ခဲ့သော အမျိုးသမီးရှေ့နေ ၂ ဦးကိုလည်း စစ်တွေတရားရုံးက စက်တင်ဘာ ၂၂ ရက်တွင် ရှေ့နေပါဝါများ ရုပ်သိမ်းခဲ့ကြောင်း သိရသည်။

“ဆရာတော်ကို မာတုဂါမနဲ့ ဖောက်ပြားတယ်ဆိုပြီး စွပ်စွဲတယ်။ အခု သူတို့ စွပ်စွဲတဲ့ မာတုဂါမကိုယ်တိုင်က သူနဲ့ မကျူးလွန် ပါဘူးဆိုပြီး တရားရုံးမှာ ထွက်ဆိုထားတယ်။ တကယ်ဆို ဒီအမှုတွေဟာ သံဃာ့အဖွဲ့အစည်းကသာ ၀ိနည်းနဲ့ အညီ စစ်မေးပြီး လိုအပ်သလို ရွက်ဆောင်ခွင့်ရှိတာ။ အခုဟာကတော့ အစိုးရက သက်သက်မဲ့ ဆရာတော်ကို ထောင်ချဖို့ ကြံစည်နေတာပါ။ ဒါကြောင့် ဦးပဉ္ဇင်းတို့ စာသင်သားတွေက ဒီအမှုကို ရုပ်သိမ်းပေးဖို့နဲ့ ဆရာတော်ကို ပြန်လွှတ်ပေးဖို့ တောင်းဆိုသွားမှာပါ” ဟု စစ်တွေမြို့မှ သံဃာတော်တပါးက မိန့်သည်။

ရခိုင်ပြည်နယ်မှ ကျောင်းထိုင်ဆရာတော် ၁၄ ပါးကလည်း အရှင်ပညာစာရအမှုကို ထိန်းထိန်းသိမ်းသိမ်းဆောင်ရွက်ပေးရန် ရခိုင်ပြည်နယ်တိုင်းမှူးထံ ယခုလ ၇ ရက်က လက်မှတ်ရေးထိုး စာပေးပို့ထားခဲ့သော်လည်း အကြောင်း ပြန်ကြားခြင်းမရှိခဲ့ကြောင်း သိရသည်။

အရှင်ပညာစာရသည် စစ်တွေမြို့၊ ကန်တော်ကြီး ရပ်ကွက်တွင် မဟာမုနိ ဗုဒ္ဓ၀ိဟာရ ကျောင်းတိုက်ကို ၁၉၉၀ ခုနှစ်က စတင် တည်ထောင်ခဲ့ပြီး မိဘမဲ့ ကလေးများကို လက်ခံ စောင့်ရှောက်ထားကာ ရခိုင်ယဉ်ကျေးမှုဆိုင်ရာ ပစ္စည်းများကို ရှာဖွေစုဆောင်း လေ့ရှိသည့် သမိုင်းသုတေသီတဦးဖြစ်ခြင်းကြောင့် နိုင်ငံခြားသားများနှင့် ထိတွေ့ဆက်ဆံမှုများရှိခဲ့ရာ အာဏာပိုင်များက  သဘောမတွေ့သဖြင့် အမှုရှာဖမ်းဆီးခြင်းဖြစ်နိုင်ကြောင်း  ဒေသခံတဦးက ပြောသည်။ 

ယမန်နေ့ကလည်း မွန်သံဃာတပါးကို အင်းစိန်ထောင်အထူးတရားရုံး၌ ထောင်ဒဏ် ၁၅ နှစ်အထိ ချမှတ်ခဲ့သည်။

မြန်မာနိုင်ငံတ၀န်းရှိ ထောင်များထဲတွင် သံဃာတော် ၂၅၇ ပါးနှင့် သီလရှင် ၆ ပါးကို နအဖ စစ်အစိုးရက ထိန်းသိမ်း ထားဆဲဖြစ်ကြောင်း ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ စာရင်းတွင် ဖော်ပြထားသည်။

http://www.irrawaddy.org/bur/index.php/news/1-news/4162-2010-09-28-11-40-51

-------------
မောင်အေး
-------------

Photo by: Rammawaddy.blogspot

စစ်တွေမြို့တွင် မတရား ဖမ်းဆီး လူဝတ်လဲခံရပြီး တရား ရင်ဆိုင်နေရသည့် ဆရာတော် အရှင် ပညာစာရ လွတ်မြောက်ရေး အတွက် ရခိုင်ပြည်နယ် တခုလုံး အတိုင်းအတာဖြင့် သံဃာတော်များ စုပေါင်း လက်မှတ်ရေးထိုး တောင်းဆိုသွားမည်ဟု သတင်း ရရှိသည်။

ဦးဆောင်ရာတွင် ပါဝင်သည့် ရဟန်းတော် တပါးက “ အခု အစီအစဉ်ကို စာသင်သား ရဟန်းတော် တွေက ဦးဆောင်လုပ်ကိုင်တာ ဖြစ်ပါတယ်။ ဆရာတော် ပညာစာရမှာ အပြစ်မရှိတဲ့ အတွက် တရား ဥပဒေအတိုင်း ဖြစ်စေလိုတဲ့ အတွက် ခုလို စီစဉ်ဆောင်ရွက်တာ ဖြစ်ပါတယ်” ဟု ပြောသည်။

အဆိုပါ လှုပ်ရှားမှုကို ယခုအခါ မြောက်ဦး၊ ကျောက်တော်၊ စစ်တွေ၊ ရမ်းဗြဲ၊ မာန်အောင်၊ ပုဏ္ဍားကျွန်းနှင့် မင်းပြား မြို့နယ်များတွင် စတင် ပြုလုပ်နေပြီ ဖြစ်ကြောင်း သူကပြောသည်။

“ဦးဇင်းတို့အခု လက်မှတ်တွေ ကောက်ခံနေတယ်။ နယ်ခံ ကိုယ်တော်တွေက မြို့နယ် အလိုက် ကောက်ခံနေတာ ဖြစ်တယ်။ တချို့ဆရာတော်ကြီးတွေလည်း ပါဝင်လာပါတယ်။ အခုတော့ ၂၀၀ လောက်ပဲ ရသေးတယ်။ ဘယ်လောက်ထိ ရမယ်ဆိုတာတော့ အတိအကျမပြောနိုင်သေးဘူး။ မကြာမှီ တင်ဖြစ်ဖို့ ဦးဇင်းထင်တယ်။”

ယခုကဲ့သို့ သံဃာတော်များ တစ်ပြည်နယ်လုံးအတိုင်းတာဖြင့် တောင်ဆိုရန် စီစဉ်လာရခြင်းမှာ စစ်တွေမြို့မှ တကာတကာမများ၏ တိုက်တွန်းမှုကြောင်း ဖြစ်သည်ဟု အဆိုပါ ရဟန်း တော်မှ ဆက်ပြောသည်။

“ဒီလိုဖြစ်လာဖို့ အဓိကအားပေးတာက ဒီကတကာတကာမတွေ အားပေးမှုကြောင့်ပါပဲ။ ဦးဇင်း တို့ ဆွမ်းခံကြွရင် တကာ တကာမတွေက ပြောတယ်။ ဦးဇင်းတို့ တောင်းဆိုလို့ ရွှေဝါရောင် တော် လှန်ရေးတုန်းကလည်း ရေလှူလို့ အဖမ်းခံရတဲ့ ကလေးနှစ်ဦး လွတ်လာတယ်။ ဒီကိစ္စမှာ လည်း ဦးဇင်းတို့ စုပေါင်း တောင်းဆိုရင် လွတ်နိုင်တယ်။ ဦးဇင်းတို့လုပ်သင့်တယ်ပေါ့။ ဒီလိုတကာတွေ တိုက်တွန်းလာတော့ ဦးဇင်းတို့လည်း အမှန်တရားအတွက် လုပ်သင့်တယ် ထင်ပီး ခုလို စီစဉ် လုပ်ကိုင်ဆောင်ရွက်ရတာ ဖြစ်ပါတယ်။”

ဆရာတော် ပညာစာရမှာ အမျိုးဘာသာ သာသနာ အကျိုးကို ဆောင်ရွက်နေသော ရဟန်းတော် တပါးဖြစ်သည့် အပြင် မိဘမဲ့ လူမမယ် ကလေးများ အကျိုးကို ကိုယ်ကျိုးစွန့် ဆောင်ရွက်နေသည့် ပုဂ္ဂိုလ်ဖြစ်၍ သက်ညှာသောအားဖြင့် လွတ်ပေးရန် အနောက်ပိုင်တိုင်းမှူးကို မေတ္တာရပ်ခံသွားမည် ဖြစ်ကြောင်း သူက ပြောသည်။

စက်တင်္ဘာလ ၇ ရက်နေ့ကလည်း ဆရာတော်ပညာစာရအား တရားမျှတစွာ စစ်ဆေးရန် စစ်တွေ ပုဏ္ဍားကျွန်း မင်းပြားမြို့နယ်များမှ ဆရာတော် ၁၅ ပါးက အနောက်ပိုင်း တိုင်းမှူး ဗိုလ်မှူးချုပ် စိုးသိန်းထံ စာရေး မေတ္တာ ရပ်ခံခဲ့သော်လည်း တစုံတရာ ပြန်ကြားမှု မရှိကြောင်း သိရသည်။

ယခုအကြိမ်တွင်လည်း အာဏာပိုင်များဘက်မှ တစုံတရာတုန့်ပြန်မှု မရှိပါက သံဃာတော်များ အနေဖြင့် ဆရာတော် လွတ်မြောက်ရေး ဆက်လက်ကြိုးပမ်း သွားမည်ဖြစ်ကြောင်း သူပြောသည်။

ဆရာတော် အရှင်ပညာစာရကို နေ့စဉ်ဆက်တိုက် ရုံးထုတ်စစ်ဆေးနေပြီး ဆရာတော်ဘက်မှ လိုက်ပါဆောင်ရွက်ပေးနေသူ ရှေ့နေနှစ်ဦးကိုလည်း တနင်္လာနေ့က ရှေ့နေပါဝါ ရုတ်သိမ်း လိုက်သည့်အတွက် ရှေ့နေဒေါ် အေးနုစိန်တဦးသာ လိုက်ပါဆောင် ရွက်နေကြောင်း သိရသည်။

: ----------------------------------- ----------------------------------- ----------------------------------- :

(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)

http://www.narinjara.com/detailsbur.asp?id=2761

ချိပ်ပိတ်ထားသော မဟာမုနိ ဗုဒ္ဓ၀ိဟာရ ကျောင်းတံခါးကို ယခု ပြန်လည် ဖွင့်လှစ်ထားသည်ကို မြင်တွေ့ရစဉ်

စစ်တွေမြို့ရှိ မဟာမုနိ် ဗုဒ္ဓ၀ိဟာရကျောင်းတွင် ရဟန်းတော်များ ပြုလုပ်ရန် စီစဉ် ထားသော အစည်းအဝေးကို ရဲအဖွဲ့က၀င်ရောက် တားဆီးသဖြင့် အစည်းအဝေးကို ဖျက်သိမ်းလိုက်ရကြောင်း သတင်း ရရှိသည်။

အမည် မဖေါ်လိုသူ ရဟန်းတော် တစ်ပါးက “ အစည်းအဝေးကို စက်တင်္ဘာလ ၂၁ ရက်နေ့ နေ့လည် တစ်နာရီ မှာ မဟာမုနိ ဗုဒ္ဓ၀ိဟာရ ကျောင်းထဲမှာ ပြုလုပ်မယ်ဖို့ စီစဉ်ထားတာ ဖြစ်ပါတယ်။ ရဟန်းတော်တွေ ရောက်လာပီး အစည်း အဝေး မစခင် အချိ်န်ပိုင်း အတွင်းမှာဘဲ မင်းဂံရဲစခန်းက စခန်းမှူးနဲ့ အဖွဲ့ ရောက်လာပြီး အစည်းအဝေး မလုပ်ရဘူးဆိုပီး လာတားတဲ့ အတွက် အစည်းအဝေး ကို ဖျက်သိမ်းလိုက်ရပါတယ်” ဟု ပြောသည်။

အစည်းအဝေးကို ဝေသာလီ ဓမ္မပါလ ကျောင်းဆရာတော်မှ ဦးဆောင်၍ နီးစပ်ရာ ရဟန်းတော်များကို ဖိတ်ကြားကာ ပြုလုပ်ရန် စီစဉ်ခြင်း ဖြစ်သည်။

“ ဆရာတော်က နီးစပ်ရာ ရဟန်းတော်တွေကို ခေါ်ယူပြီး အရှင်ပညာ စာရ အတွက် နှီးနှော တိုင်ပင်လိုတယ်ဆိုပီး ခေါ်ယူတာ ဖြစ်ပါတယ်။ အရှင်ပညာစာရ အတွက် ဘယ်လို လုပ်ဆောင် မလဲ ဆိုတာကို ဆွေးနွေးရေး အတွက် ဖြစ်ပါတယ်။ ရဟန်းတော် ဆယ်ပါးခန့် ရောက်ရှိလာတဲ့ အချိ်န်မှာ ရဲသားတွေက သတင်းရသွားပီး လူစု လူဝေး မလုပ်ရဘူး။ အစည်း အဝေး လုပ်ရင် အာဏာဖီဆန်မူနဲ့ ဖမ်းမယ်ဆိုတော့ ပြဿနာ မတက်ချင်တာနဲ့ ဦးဇင်းတို့ အစည်းအဝေး လုပ်မှာကို လက်လျော့ လိုက်ပါတယ်” ဟု အဆိုပါ ရဟန်းတော်က ပြောသည်။

ယခုအခါ ဆရာတော် အရှင်ပညာစာရ သတင်းသုံးခဲ့ရာ မဟာမုနိ ဗုဒ္ဓ၀ိဟာရ ကျောင်းအား ချိတ်ပိတ်ထားရာမှ ကျောင်းတံခါးကို ဖွင့်လှစ်ထားပြီး ရဲအဖွဲ့ဝင်များက အနီးအနားမှ စောင့်ကြည့် နေကြောင်း သိရသည်။

“ သူတို့ ဘာကြောင့် ကျောင်းကို ချိ်တ်ပိတ်ထားရာကနေ ပြန်လည် ဖွင့်လှစ် လိုက်တယ် ဆိုတာကို မသိရဘူး။ တစ်ခုခုတော့ နောက်ကွယ်က အကြောင်းအရာတွေ ရှိမယ်။ ဆရာတော်ကို စွပ်စွဲထားတဲ့ အမူတွေလည်း တစ်ခုပီး တစ်ခု မဟုတ်မမှန်း သိလာတော့ အာဏာပိုင်တွေရဲ့ မတရားလုပ်ရပ်ကလည်း ပေါ်လာပြီလေ။ သူတို့ ဘာဆက် လုပ်မလဲ ဆိုတာတော့ စောင့်ကြည့်ရမှာ ဖြစ်ပါတယ်” ဟု ရဟန်းတော်က မိန့်ကြားသည်။

နောက်ဆုံး ရရှိသော သတင်းအရ ဆရာတော်အား စစ်ဆေးရန် အမူ တစ်ခုတည်းသာ ကျန်ရှိပြီး အဆိုပါ အမူမှာ နိုင်ငံတကာမှ ကျောင်းအတွက် ပို့သော ငွေကြေးများကို အလွဲသုံးစား လုပ်မူ ဖြစ်သည်ဟု သိရသည်။

: ----------------------------------- ----------------------------------- ----------------------------------- :

(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)

http://www.narinjara.com/detailsbur.asp?id=2755

မောင်အေး
--------------

အရှင်ပညာစာရ ဖမ်းဆီးခံရပြီးနောက် လူသူ မရှ်ိ ခြောက်ကပ်နေသော မဟာမုနိ ဗုဒ္ဓ၀ိဟာရ

ရခိုင်ပြည်နယ် စစ်တွေမြို့တွင် မတရား ဖမ်းဆီး လူဝတ်လဲ ခံရပြီး အမှုရင်ဆိုင်နေရသည့် ဆရာတော် ပညာစာရ၏ အမှု ကို ယခု အပတ် အတွင်း အပြီးသတ် ဆုံးဖြတ်မည် ဖြစ်ကြောင်း စစ်တွေမြို့မှ တရားရုံးနှင့် နီးစပ်သူ တစ်ဦးက ပြောသည်။

ဆရာတော်၏ အမှုကို အမြန်ဆုံး တရား ဆုံးဖြတ်နိုင်ရန် အတွက် ဆရာတော်ကို နေ့စဉ် ရက်ဆက် ရုံးထုတ် စစ်ဆေးနေကြောင်း အဆိုပါ မြို့ခံမှ ပြောသည်။

“ဒီအပတ်ထဲမှာ အပြီးစစ်မယ်လို့ သိရတယ်။ တနင်္လာနေ့က ရုံးထုတ်တဲ့ အခါမှာလည်း ဆရာတော်နဲ့ စွပ်စွဲထားတဲ့ အမျိုးသမီး နှစ်ယောက်က ဆရာတော်နဲ့ ပြစ်မှားတာ မရှိလို့ထွက်ဆို သွားတယ်။ မနေ့ကလည်း စစ်တွေက အမျိုးသမီးတွေ တချို့ ဆရာတော်ဘက်က သက်သေ ထွက်ဆိုကြတယ်။ ဒီနေ့လည်း ရုံးထုတ်လို့ မြို့ကလူကြီး တချို့ ဆရာတော်ဘက်က သက်သေထွက်ဖို့ တရားရုံးကို လိုက်သွား ကြတယ်။”

ဒေါ်မာလာနှင့် မသန်းမေတို့မှ မိမိတို့မှာ ဆရာတော်နှင့် တစုံတရာ ပြစ်မှားမိခြင်း မရှိကြောင်း ရုံးတော်တွင် တိုက်ရိုက် လျှောက်လဲချက် ပေးခဲ့ကြောင်း သိရသည်။

ယခုအခါ ဆရာတော် အမူတွင် အစိုးရဘက်က အနိုင်ရရေး အတွက် ရှေ့နေ သုံးဦး လိုက်ပါ ဆောင်ရွက်နေကြောင်း၊ ဆရာတော်ဘက်မှ ရှေ့နေမ ဒေါ်အေးနုစိန်က တဦးတည်းသာ လိုက်ပါ ဆောင်ရွက်နေကြောင်း၊ မြို့ခံအများအပြားကလည်း ဆရာတော်ဘက်မှ ရပ်တည်ပြီး သက်သေထွက် ဆိုနေကြကြောင်း သူက ပြောသည်။

လက်ရှိ မဟာမုနိ ဗုဒ္ဓ၀ိဟာရ

ယခုအခါ ဆရာတော်အား မဟုတ် မတရား စွပ်စွဲထားသည့် အမှု ၇ မှု အထဲမှ ပုဒ်မ ၅၀၅(ခ) နိုင်ငံတော် တည်ငြိမ်ရေးကို ထိပါးနှောင့်ယှက်မှုနှင့် တခြား စွဲချက်တခုကို တရားရုံးမှ လုံးဝ ပလပ် လိုက်ပြီး ကျန် ၅မှုကိုသာ စစ်ဆေး နေကြောင်း သူက ပြောသည်။

စစ်တွေမြို့ခံအများအပြားမှာ ဆရာတော်အား ဖမ်းဆီးစဉ်က ဆရာတော်နှင့် ပတ်သက်ပြီး ယောင်လည်လည် ဖြစ်နေခဲ့သော်လည်း ယခုအခါ ဆရာတော်ဘက်မှာ သိသိသာသာ ရပ်တည် လာကြပြီး အဖြစ်မှန်ကို နားလည် သဘောပေါက် လာကြောင်း သူကပြောသည်။

“ပထမကတော့ မြို့လူထု အများစုက ဆရာတော်နဲ့ပတ်သတ်လို့ ယောင်ဝါးဝါး ဖြစ်နေကြတယ်။ အခုတော့ မာတေဇာက လူတွေ မမှန်မကန် လုပ်တယ်ဆိုတာ သိလာကြတဲ့ အတွက် အများကတော့ ဆရာတော်ဘက်က ရပ်တည်လာကြပါတယ် ”ဟု ပြောသည်။

သို့သော်လည်း ဆရာတော်မှာ ရခိုင် အမျိုးသားရေးကို ဆောင်ရွက်သော ပုဂ္ဂိုလ် တပါး ဖြစ်သဖြင့် ဗြိတိသျှ နယ်ချဲ့ အင်္ဂလိပ်တို့ ဆရာတော် ဦးတ္တမအား ထောင်ချသကဲ့သို့ နအဖ စစ်အစိုးရမှ ဆရာတော် ပညာစာရကိုလည်း အမူတခုခုဖြင့် အကွက်ဆင် အပြစ်ရှာပြီး ထောင်ချနိုင်ကြောင်း တတ်သိ နားလည်သူများက ပြောဆိုနေကြသည်ဟု သူက ပြောသည်။

ဆရာတော်ကို တနည်းနည်းဖြင့် ထောင်ကျအောင် ချမည်ဖြစ်ပြီး စစ်ကိုင်းတိုင်း ခန္တီးထောင်သို့ ပြောင်းရွေ့မည် ဆိုသော သတင်းလည်း စစ် တွေမြို့တွင် ထွက်ပေါ်နေကြောင်း သိရသည်။

: ----------------------------------- ----------------------------------- ----------------------------------- :

(နိရဉ္စရာ သတင်းများကို မည်သူ မဆို လွတ်လပ်စွာ ကူးယူ အသုံးပြုနိုင်ပါသည်။ သို့သော် သတင်းရင်းမြစ်နေရာတွင် နိရဉ္စရာ နာမည်ကို ဖေါ်ပြပေးစေလိုပါသည်။)

http://www.narinjara.com/detailsbur.asp?id=2753