ငွေတစ်ရာကျပ် အလည်ထွက်သည်။
Geschrieben am 20.04.2010 von
shweyoat
``မမ ဒီထဲက တစ်ရာတန်လေးရော´´
``အမ်းလိုက်တယ်လေ...´´
``ဟာသွားပါပြီ အဲ့ပိုက်ဆံက ကလပ်စတစ်ကဒ်လောင်းဖို့သူမျာလာပေးထားတာ´´
``အဲ........´´
ရွှေရုပ် ခုနကလေးတင်မှ အမ်းလိုက်တဲ့တစ်ရာတန်တစ်ရွက်ကိုသတိရတယ်။အသစ်လေး နှမြောပေမယ့် အမ်းစရာမရှိတော့ အမ်းလိုက်မိပြီဘဲ။
မတက်နိုင်ဘူးလေ။ အဲ့ဒီပိုက်ဆံရသွားတဲ့သူက ခုဆိုဘယ်ရောက်နေလဲမသိဘူး ။ဓါတ်ပုံလာရိုက်တဲ့သူဘဲသိတယ် ။သူဓါတ်ပုံလာရွေးတော့ အဲ့တစ်ရာတန်က ကျန်မှာမှမဟုတ်တာ။
``တစ်ရာတန်အသစ် လိုက်ရှာပြီး ကဒ်လောင်းပေးလိုက်ပေါ့ဟာ.....´´
``ဟာမရဘူး မရဘူး သူပိုက်ဆံသူကနံပါတ်တွေမှတ်ထားတာ ခုနှစ်ကြီးဘဲ ...´´
``ပတ်တာဘဲ ....´´
ဒါနဲ့ ဘယ်သူ့ကိုအမ်းတာလဲ ဆိုပြီး လိုက်ရတာပေါ့ ။ပိုက်ဆံကဒ်လာလောင်းခိုင်းသူတွေက ပိုက်ဆံကိုသိဒ္ဓိတင်ထားတယ်ထင်တယ်။ဘာဘဲ ဖြစ်ဖြစ် ကိုယ့်ဆိုင်ကိုလာအားပေးတဲ့ ဖောက်သည်ဆိုတော့ ဒီတစ်ရာတန်ရဖို့အရေး ရွှေရုပ်အရေးဖြစ်လို့လာပါတယ်။
``အရှေ့ သစ်သီးဆိုင်ကတဲ့ လိုက်မယ်လာ...´´
တစ်ရာတန်တစ်ရွက်အတွက် နေပူကြီးထဲကိုပေါ့။
``ခုနကလေ ဒီမှာဓါတ်ပုံလာရိုက်တဲ့ အမကြီး ´´
``ဒီမှာပါ ကျွန်မဘာကျန်ခဲ့လို့လဲ...´´
``ပိုက်ဆံပါ ...´´
``ဟုတ်ပါရဲ့ ကျွန်မ ထောင်တန်အထပ်လိုက်လေးတွေ ဘယ်ကျကျန်ခဲ့လဲလို့ လက်ဆတ်သတ်တော့...´´
``ဟင် ဟုတ်ပါဘူးတစ်ရာပါ ....´´
ရွှေရုပ်ရဲ့ စကားမှာအဲ့အမကြီးက
``တစ်ရာများညီမရယ် ရပါတယ် အားနာစရာကွယ်...´´
``အာာ ရှုပ်ကုန်ပြီ ရွှေရုပ်ကလေ အမကို ပိုက်ဆံပြန်အမ်းတုန်းက တစ်ရာတန် အသစ်လေးပါသွားတယ်။ အဲ့ဒါသူများကဒ်လာလောင်းခိုင်းထားတာတဲ့ ပြီးတော့မှသိလို့ ´
``ဟယ် အဲ့ဒါ သမီးလေးဆီမှာ ...အငယ်မရေ အငယ်မ...´´
ရွှေရုပ်စိတ်တွေညစ်လာပါတယ် ။ ခနလေးဘဲရှိသေးတယ် အငယ်မဆီရောက်သွားတယ်တဲ့ အဲ့တော့ အဲ့အမကြီးရဲ့ သမီးကိုလိုက်ရှာရတာပေါ့ ။
လိုက်ရှာလိုက်တာနောက်ဆုံး သရက်ပင်ကြီးအောက်မှာ တုတ်ထိုးစားနေတာကိုတွေ့ရပါတယ်... သူကလေးလေးကပြောတော့
``မီး ၀က်သားတုတ်ထိုးဝယ်စားလိုက်တယ် ´´
ကဲလိုက်ပေဦးတော့ ၀က်သားတုတ်ထိုးဆိုင် ဆိုင်မှာလူတွေများတယ် ။ ပြီးတော့ ရွှေရုပ်ဝက်သားမစားဘူး အနံ့ရတောင် မှုးတယ် ။ တက်နိုင်ဘူးလေ ။
ဝက်သားတုတ်တိုးသည်က
``၀ခုနကဘဲ အဲ့တီရာတန်လေးကို ဦးမောင်မြင့် (ရပ်ကွက်လူကြီး )ကိုအမ်းလိုက်တယ်။ ´´
``ဟာ......´´
အကြီးကြီးကို ဟာလိုက်ပါတယ် ။ စိတ်ဓါတ်တို့က ရပ်ကွက်ရုံးကိုပြေးရတော့မယ်။ ရုံးရှေုမှာလူတွေ ပြုံနေပါတယ်။ တစ်ရာတန်ကား အမြီးတောင်မတွေ့ (အမြီးတော့ဘယ်တွေ့မလဲနော် တစ်ရာတန်က မျောက်မှမဟုတ်တာဘဲ)ကြည့်တော့ ရပ်ကွက်ရုံးမှာ အမှုစစ်နေခြင်းပင်။
``ကျွန်မ ကို အမေက ဒီမြေကွက် ကျွန်မအတွက်လို့ပေးပြီးသား... ခုမှ သူတို့ကဘယ်ကရောက်လာလဲ မသိဘူးကျွန်မမှာ ဆွေမရှိမျိုးမရှိ တစ်ကောင်ကြွက် အီးဟီးဟီး လူကြီးမင်းရယ် ´´
ရွှေရုပ်ပါငိုချင်လာတယ် သူကတစ်ကောင်ကြွက် ရွှေရုပ်ကတစ်ရာလိုချင်တာ ရပ်ကွက်လူကြီးကတော့ အမှုတွေကိုနားထောင်လို့ တစ်ရာတန်သူ့အိတ်ထဲမှာထင်တယ် ပြေးနှိုက်လိုက်ရနော်။ သူတို့ အမှုစစ်နေတုန်း အဲ့အမကြီးတို့ အမှု့ ဟက်ရှလောင်းဆိုပြီးသွားတယ်။ သူတို့ပြောတဲ့ အမေက မသေသေးဘူး အိပ်ယာပေါ်မှာ ဖုတ်လိုက်ဖုတ်လိုက်ဖြစ်နေတာ အမေတောင်မသေသေးဘူး မောင်နှမတွေ အမွေလုနေတာ သူ့အမေက အဲ့တာ အိပ်ယာကနေထလာပြီး ဘယ်သူမှမပေးဘူး ဘုန်းကြီးကျောင်းကိုလှူမယ်လို့ပြောသွားတော့ ခုန အမွေ လုတဲ့အုပ်စု ပြန်ထွက်သွားတော့မှ
``အန်ကယ်ကြီး ....´´
မျက်မှန်ပေါ်ကနေ ကျော်ကြည့်တဲ့ ရပ်ကွက်လူကြီးက
``သမီးဘာပျောက်လို့လဲ´´
``ရှင်..... တစ်ရာပါ ´´
``ဟင် ....´´
ရပ်ကွက်လူုကြီးစိတ်ညစ်သွားတယ် တစ်ရာပျောက်တာကိုလာတိုင်တဲ့ကလေးမကိုလဲကြည့်တော့ အဲ့လောက်လဲ ``မဟုတ်ပါဘူး ဒါနဲ့ ဘယ်သူယူသွားတာလဲ ´´
``အန်ကယ်ကြီး´´
``ဟာ..´´
ရွှေရုပ်နဲ့ အဲ့ရပ်ကွက်လူကြီး အမေးနဲ့အဖြေကြားမှာတိုင်ပတ်ပြီးမှ
``ကွမ်းယာဆိုင်မှာ ´´
ပြေးဦးရွှေရုပ်ကွမ်းယာဆိုင်ကို နေ့လည်ကနေတစ်ရာရှာပုံတော်ဖွင့်နေတာ ညနေရောက်လာပါတယ် ။တစ်ရာတန်က ခုထိ ကွင်းဆက် မပြတ်အောင် အသည်းသန်ကြိုးစားရတုန်း
ကွမ်းယာဆိုင်မှာ ကျတော့
``ဟိုလူကိုအမ်းလိုက်တယ် ´´
``ဗျို့ခဏ ခဏ......´´
ရွှေရုပ်အော်ခေါ်ပါသော်လည်း ပြန်၍တောင်လှည့်မကြည့် ကားပေါ်တက်ပြီး မောင်းသွားတာ တစ်ယောက်ယောက်ကိုများစိတ်ဆိုးနေသလား....
ရွှေရုပ် ဗိုက်တွေလဲ ဆာလာခဲ့ပါတယ်။ ညနေလဲ စောင်းနေပါပြီ ။ပိုက်ဆံကဒ်လာလောင်းခိုင်တဲ့သူကို ဘယ်လိုနည်းနဲ့တောင်းပန်ရမလဲဆိုတာ စဉ်းစားရင်း အောင်မြင်စွာဆုတ်ခွာခဲ့ပါတော့တယ် ။
ရွှေရုပ်တို့ ဆိုင်ရှေ့မှာခုနကကား ကိုတွေ့လိုက်တဲ့အချိန်မှာ ရင်ထဲ ၀ုန်းကနဲဆိုပျော်သွားပါတယ် ။ခြေလှမ်းတွေကမြန်လာပြီး ဆိုင်ကိုရောက်တော့ အဲ့လူ့က ပိုက်ဆံရှင်းတဲ့ထဲမှာ အဲ့တစ်ရာတန်လေး ကို ရင်ခုန်စွာတွေ့လိုက်ရပါတယ်။
.........................................................................
ပြုံးပျော်နိုင်ပါစေ
ရွှေရုပ်